Blaganna Aistear

Is uirlis ar líne í Treoir Chleachtais Aistear Síolta a dearadh chun tacú le hoideoirí luathbhlianta úsáid a bhaint as Aistear: Creatchuraclam na Luath-Óige (Rialtas na hÉireann, 2024) agus Síolta: an Chreatlach Náisiúnta Cáilíochta d’Oideachas Luath Óige (Rialtas na hÉireann, 2017) i dteannta a chéile ina gcleachtas le naíonáin, lapadáin agus leanaí óga.

Tugadh Aistear cothrom le dáta le deireanaí, agus tugadh an Treoir Chleachtais cothrom le dáta freisin go mbeidh sí ag teacht leis an gCreat nuashonraithe.  Leis na nuashonruithe sin, cuirtear beocht i bhfís Aistear sa chleachtas laethúil. Leis an Treoir Chleachtais, cuirtear ar chumas na n-oideoirí i gcónaí, leis an eolas agus an tacaíocht, Aistear a léirmhíniú, a gcleachtas a fheabhsú, agus eispéiris foghlama a chruthú atá ionchuimsitheach, freagrúil, agus fiúntach. Cuirtear chun cinn forbairt na dtimpeallachtaí luathfhoghlama ina dtacaítear le naíonáin, lapadáin agus leanaí óga, ina léirítear meas orthu, agus ina n-aithnítear gur saoránaigh dhomhanda ghníomhaíocha iad.

Nuair a cheadaítear an Treoir Chleachtais Aistear Síolta nuashonraithe, cuirtear ar chumas oideoirí luathbhlianta tógáil ar eolas gairmiúil atá acu cheana agus cur lena dtuiscint ar chleachtas ardchaighdeáin. Tá na Príomhphrionsabail atá mar bhonn eolais faoi Síolta agus Aistear araon – lena n-áirítear caidrimh, spraoi agus cearta leanaí – fós ríthábhachtach maidir leis na nuashonruithe. Sa Treoir Chleachtais, aithnítear gur gairmithe gníomhaíocha, inniúla, muiníneacha agus machnamhacha iad oideoirí, a bhaineann leas as a gcuid eolais, caidreamh agus breithiúnais féin chun machnamh a dhéanamh ar a gcleachtas faoi láthair agus réimsí fáis a shainaithint. Tacaíonn sí i gcónaí le hoideoirí luathbhlianta agus iad ag obair le Síolta agus Aistear araon ar bhealach atá comhtháite, machnamhach agus bunaithe ar an gcleachtas laethúil.

Chun tacaíochtaí d’earnáil na luathbhlianta a neartú agus a ailíniú, aistríodh Treoir Chleachtais Aistear Síolta go dtí an suíomh gréasáin Scileanna a Chothú. Tá an Treoir Chleachtais mar chuid de chóras níos leithne foghlama agus forbartha gairmiúla anois, agus tugann an t-aistriú seo i gcomhréir níos dlúithe í le beartas náisiúnta agus déanann sé níos éasca ar oideoirí luathbhlianta é rochtain a fháil ar réimse leathan acmhainní nasctha in aon áit amháin. Tá cur amach fós ar an ábhar nuashonraithe, agus tá tuilleadh nuashonruithe agus tacaíochtaí beartaithe sna míonna agus sna blianta amach romhainn.

Struchtúr na Treorach Cleachtais 
Coinníonn an Treoir Chleachtais nuashonraithe struchtúr an bhunleagain. Rinneadh príomh-nuashonruithe ar ainmneacha na gColún Cleachtais chun léiriú níos fearr a thabhairt ar Aistear nuashonraithe. Áirítear sa Treoir Chleachtais: Bunchlocha an Churaclaim agus, Sé Cholún Cleachtais idirnasctha 
1.    Comhpháirtíochtaí agus Ceangail 
2.    Timpeallachtaí Foghlama 
3.    Foghlaim trí mheán an tSúgartha 
4.    Caidrimh agus Idirghníomhaíochtaí 
5.    Pleanáil agus Measúnú 
6.    Ag tacú le hAistrithe 

Inneachar na gColún Cleachtais 
Dearadh na Colúin Chleachtais chun tacú le hoideoirí luathbhlianta machnamh a dhéanamh ar ghnéithe sonracha dá gcleachtas. I ngach Colún, tugtar mionchuntas ar réimsí éagsúla cleachtais agus tacaítear le hoideoirí chun éachtaí, dúshláin agus réimsí le feabhsú a shainaithint trí na huirlisí féinmheastóireachta. Chun tacú leis an bpróiseas sin, tá Treoracha d’Oideoirí ar fáil ar réimse ábhar – ina dtugtar léargais níos doimhne, straitéisí praiticiúla, agus inspioráid le haghaidh machnamh fiúntach agus athrú dearfach sa chleachtas laethúil. I measc na n-ábhar atá ann cheana tá: curaclam éiritheach atá bunaithe ar chearta agus ar fhiosrú a chur le chéile; ábhair oscailte a úsáid; ról an phríomhtheagmhálaí; an tábhacht a bhaineann le hoideolaíocht mhall chaidreamhach in idirghníomhaíochtaí le naíonáin, lapadáin agus leanaí óga; scéimrí a thuiscint; an tábhacht a bhaineann le súgradh; cuir chuige i leith comhpháirtíochtaí agus naisc le teaghlaigh a fhorbairt; cuir chuige i leith na pleanála agus an mheasúnaithe; agus tacaíocht le haistrithe.

I measc na n-acmhainní atá á bhforbairt faoi láthair, tá: Treoracha nua d’Oideoirí agus físeáin spreagúla chleachtais lena gclúdaítear réimse leathan ábhar, mar shampla:
•    Cearta agus cumas gníomhúcháin leanaí
•    An t oideoir gníomhaíoch
•    Comhionannas agus ionchuimsiú
•    Rannpháirtíocht an teaghlaigh agus an phobail
•    Rannpháirtíocht sna hEalaíona, múscailtí agus an fhoghlaim faoin aer
•    Tuiscint ar inbhuanaitheacht agus foghlaim ó ghlúin go glúin
•    Tuiscint a fháil ar ‘ghuth’ naíonán, lapadán agus leanaí óga agus freagairt dóibh
•    Úsáid a bhaint as Timthriall Machnamhach na Pleanála agus an Mheasúnaithe

Spreagtar oideoirí luathbhlianta a bheith ag plé leis an Treoir Chleachtais nuashonraithe leis an meon céanna a léirítear inti – go tuisceanach, fiosrach agus le machnamh gairmiúil. Pléifidh gach suíomh leis na hábhair ar a bhealach féin, faoi threoir láidreachtaí, spéiseanna agus riachtanais na naíonán, lapadán agus leanaí óga, na dteaghlach agus na n-oideoirí luathbhlianta atá sa suíomh sin. Ní ann d’aon chonair aonair.

Tá sé tábhachtach gur féidir – agus gur cheart – rannpháirtíocht leis an Treoir Chleachtais nuashonraithe tarlú ar luas soláimhsithe. Moltar d’oideoirí luathbhlianta a gcuid ama a ghlacadh, réimsí spéise a fhiosrú, súil a chaitheamh ar thacaíochtaí a bhfuil cur amach acu orthu arís, mar shampla na huirlisí féinmheastóireachta, agus úsáid a bhaint as inneachar nua diaidh ar ndiaidh de réir mar a bheidh sé ar fáil. 

Léigh blaganna roimhe seo anseo.